ഇന്ത്യൻ അണ്ടർ-17 പുരുഷ ഫുട്ബോൾ ടീമിന്റെ മുഖ്യ പരിശീലകനായി മുൻ ഇന്ത്യൻ താരം മെഹ്‌റാജുദ്ദീൻ വാദുവിനെ നിയമിച്ചതായി ഓൾ ഇന്ത്യ ഫുട്ബോൾ ഫെഡറേഷൻ (AIFF) ബുധനാഴ്ച അറിയിച്ചു.

42-കാരനായ വാദു ടീമിന്റെ ചുമതലയേറ്റെടുത്തു. 2026 സെപ്റ്റംബർ 2 ബുധനാഴ്ച ഗോവയിലെ മഡ്ഗാവിൽ ബ്ലൂ കോൾട്ട്‌സ് തങ്ങളുടെ പരിശീലന ക്യാമ്പ് ആരംഭിച്ചു. എഎഫ്‌സി അണ്ടർ-17 ഏഷ്യൻ കപ്പ് ഉസ്ബെക്കിസ്ഥാൻ 2027 യോഗ്യതാ മത്സരങ്ങൾക്കുള്ള തയ്യാറെടുപ്പുകളുടെ ഭാഗമായുള്ള ട്രയൽ ഘട്ടത്തിലാണ് നിലവിൽ ക്യാമ്പ് നടക്കുന്നത്.

നവംബർ 11 മുതൽ 20 വരെ മലേഷ്യയിലെ ക്വാലാലംപൂരിലാണ് യോഗ്യതാ മത്സരങ്ങൾ നടക്കുന്നത്. ഗ്രൂപ്പ് ഇ-യിൽ ഉൾപ്പെട്ട ഇന്ത്യ, ആതിഥേയരായ മലേഷ്യ, ഫലസ്തീൻ, സിംഗപ്പൂർ, ഗുവാം എന്നിവരുമായാണ് ഏറ്റുമുട്ടുന്നത്.

എഎഫ്‌സി പ്രോ ലൈസൻസ് ഉടമയായ വാദുവിന് കളിക്കാരനായും പരിശീലകനായും വലിയ പരിചയസമ്പത്തുണ്ട്. മുഹമ്മദൻ സ്പോർട്ടിങ് ക്ലബ്ബിന്റെ മുഖ്യ പരിശീലകനായിരുന്ന അദ്ദേഹം, നേരത്തെ റിയൽ കാശ്മീർ എഫ്‌സി, സുദേവ ഡൽഹി എഫ്‌സി എന്നിവരെയും പരിശീലിപ്പിച്ചിട്ടുണ്ട്.

ഒരു കളിക്കാരനെന്ന നിലയിൽ ഇന്ത്യൻ ദേശീയ ടീമിനായി കളിച്ച വാദു, 2008-ൽ എഎഫ്‌സി ചലഞ്ച് കപ്പ് നേടിയ ടീമിലും 2011-ലെ എഎഫ്‌സി ഏഷ്യൻ കപ്പിൽ പങ്കെടുത്ത ടീമിലും അംഗമായിരുന്നു. 2005-ലെ സാഫ് ചാമ്പ്യൻഷിപ്പ്, 2007-ലെയും 2009-ലെയും നെഹ്‌റു കപ്പ് എന്നിവയിലും അദ്ദേഹം ഭാഗമായിട്ടുണ്ട്. 2015-ൽ ഐഎസ്എൽ കിരീടം നേടിയ ചെന്നൈയിൻ എഫ്‌സി ടീമിലും അദ്ദേഹം ഉണ്ടായിരുന്നു.

ഇന്ത്യൻ അണ്ടർ-17 ടീമിന്റെ പരിശീലകനാകാൻ കഴിഞ്ഞത് വലിയൊരു ബഹുമതിയായി കാണുന്നുവെന്ന് മെഹ്‌റാജുദ്ദീൻ വാദു പറഞ്ഞു. ഇതൊരു പ്രധാനപ്പെട്ട പ്രായപരിധിയാണെന്നും കളിക്കാർക്ക് ഉയർന്ന തലത്തിൽ മത്സരിക്കാനുള്ള അന്തരീക്ഷം ഒരുക്കുന്നതിനാണ് മുൻഗണന നൽകുന്നതെന്നും അദ്ദേഹം വ്യക്തമാക്കി. ട്രയലുകളോടെ ക്യാമ്പ് ആരംഭിച്ചെന്നും യോഗ്യതാ മത്സരങ്ങൾക്കായി മികച്ച രീതിയിൽ തയ്യാറെടുക്കുമെന്നും കളിക്കാർക്കൊപ്പം പ്രവർത്തിക്കാൻ കാത്തിരിക്കുകയാണെന്നും വാദു കൂട്ടിച്ചേർത്തു.

Published on Sep 02, 2026