ഒക്ടോബർ മൂന്നിന് കൊൽക്കത്തയിലെ സാൾട്ട് ലേക്ക് സ്റ്റേഡിയത്തിൽ (വിവേകാനന്ദ യുവ ഭാരതി ക്രിരംഗൻ) നടക്കുന്ന ഇന്ത്യയും ബ്രസീലും തമ്മിലുള്ള ചരിത്രപരമായ ഫുട്ബോൾ മത്സരത്തിനായി ടിക്കറ്റുകളിൽ ‘ബൈ വൺ ഗെറ്റ് വൺ’ (Buy 1 Get 1) ഓഫർ പ്രഖ്യാപിച്ച് ഓൾ ഇന്ത്യ ഫുട്ബോൾ ഫെഡറേഷൻ (AIFF).

പൊതുവായ സ്റ്റാന്റുകളിലെ ടിക്കറ്റുകൾക്കാണ് ഈ ഓഫർ ലഭ്യമാകുന്നതെന്ന് എഐഎഫ്എഫ് അറിയിച്ചു. ടിക്കറ്റുകൾ തീരുന്നത് വരെ ഈ ഓഫർ നിലനിൽക്കും.

അഞ്ച് തവണ ലോകകപ്പ് ജേതാക്കളായ ബ്രസീൽ, ഇന്ത്യയുമായുള്ള അന്താരാഷ്ട്ര സൗഹൃദ മത്സരത്തിൽ പങ്കെടുക്കുന്ന കാര്യം നേരത്തെ തന്നെ സ്ഥിരീകരിച്ചിരുന്നു.

ഈ ഉയർന്ന തലത്തിലുള്ള അന്താരാഷ്ട്ര സൗഹൃദ മത്സരത്തിന് മുന്നോടിയായി കൊൽക്കത്തയിലെ ക്ലബ്ബുകളെ പിന്തുണയ്ക്കുന്നവർക്കായി ടിക്കറ്റ് നിരക്കിൽ ഇളവ് ഏർപ്പെടുത്തുമെന്ന് എഐഎഫ്എഫ് പ്രസിഡന്റ് കല്യാൺ ചൗബേ നേരത്തെ അറിയിച്ചിരുന്നു.

വിനീഷ്യസ് ജൂനിയർ, എൻഡ്രിക്, ബ്രൂണോ ഗ്വിമാരേസ് തുടങ്ങി പ്രമുഖ താരങ്ങൾ ഉൾപ്പെടുന്ന കരുത്തുറ്റ ടീമിനെയാണ് ബ്രസീൽ ഈ മത്സരത്തിനായി പ്രഖ്യാപിച്ചിരിക്കുന്നത്. ടീമിൽ മൂന്ന് ബാലൺ ഡി ഓർ നോമിനികളും ഉൾപ്പെടുന്നുണ്ട്.

ഹെഡ് കോച്ച് കാർലോ ആഞ്ചലോട്ടിക്ക് മുന്നിൽ ആക്രമണനിരയിൽ മികച്ച അവസരങ്ങളാണുള്ളത്. വിനീഷ്യസ്, എൻഡ്രിക് എന്നിവർക്ക് പുറമെ എസ്റ്റെവാവോ, ജോവാ പെഡ്രോ, പെഡ്രോ, റയാൻ, സാമുവൽ ലിനോ എന്നിവരും ടീമിലുണ്ട്.

Published on Sep 30, 2026