കേരള ബ്ലാസ്റ്റേഴ്സിൽ മുഹമ്മദ് സനാൻ കെ; കരാർ 2029 വരെ
ഇന്ത്യൻ സൂപ്പർ ലീഗ് (ISL) ക്ലബ്ബായ കേരള ബ്ലാസ്റ്റേഴ്സ് തങ്ങളുടെ മുന്നേറ്റനിരയിലേക്ക് മുഹമ്മദ് സനാൻ കെ-യെ ടീമിലെത്തിച്ചു. ഇക്കാര്യം തിങ്കളാഴ്ചയാണ് ക്ലബ് ഔദ്യോഗികമായി അറിയിച്ചത്.
ജംഷഡ്പൂർ എഫ്‌സിയിൽ നിന്നാണ് 22-കാരനായ സനാൻ ബ്ലാസ്റ്റേഴ്സിലേക്ക് ചേക്കേറുന്നത്. 2028-29 സീസൺ അവസാനം വരെ നീളുന്ന കരാറിലാണ് താരം ഒപ്പുവെച്ചിരിക്കുന്നത്.
റിലയൻസ് ഫൗണ്ടേഷൻ യങ് ചാംപ്സ് പ്രോഗ്രാമിലൂടെ വളർന്നുവന്ന സനാൻ, 2023-24 സീസണിലാണ് ജംഷഡ്പൂരിനായി ഐഎസ്എല്ലിൽ അരങ്ങേറ്റം കുറിച്ചത്. ആദ്യ സീസണിൽ 20 ലീഗ് മത്സരങ്ങളിൽ കളിച്ച അദ്ദേഹം, 2024-25 സീസണിൽ 24 മത്സരങ്ങളിലും ബൂട്ടണിഞ്ഞു.
ജംഷഡ്പൂരിനായി വിവിധ ടൂർണമെന്റുകളിലായി 81 മത്സരങ്ങൾ കളിച്ച സനാൻ 13 ഗോളുകളും നാല് അസിസ്റ്റുകളും തന്റെ പേരിലാക്കിയിട്ടുണ്ട്.
പ്രധാനമായും ലെഫ്റ്റ് വിംഗിൽ കളിക്കുന്ന സനാൻ, എതിർ വശത്തും മധ്യഭാഗത്തും ഒരേപോലെ തിളങ്ങാൻ കഴിയുന്ന ഒരു ബഹുമുഖ ആക്രമണനിര താരമാണ്.
ഗോൾകീപ്പർ അമരീന്ദർ സിംഗ്, മുന്നേറ്റനിര താരം മുഹമ്മദ് യാസിർ എന്നിവരെ ടീമിലെത്തിച്ചതിന് പിന്നാലെയാണ് ബ്ലാസ്റ്റേഴ്സ് സനാനിന്റെ സൈനിംഗും സ്ഥിരീകരിച്ചത്.
Published on Oct 05, 2026