ഫിഫ ലോകകപ്പിൽ ഒരു പതിപ്പിൽ ഏറ്റവും കൂടുതൽ ഗോളുകൾ നേടുന്ന ആഫ്രിക്കൻ താരമെന്ന റോജർ മില്ലയുടെ 36 വർഷം പഴക്കമുള്ള റെക്കോർഡിനൊപ്പമെത്തി സെനഗൽ താരം ഇസ്മായില സാർ.

റൗണ്ട് ഓഫ് 32-ൽ ബെൽജിയത്തിനെതിരായ മത്സരത്തിന്റെ 51-ാം മിനിറ്റിൽ ഗോൾ നേടിയതോടെയാണ് സാർ ഈ നേട്ടത്തിലെത്തിയത്. ഇതോടെ 2026 ലോകകപ്പിൽ താരം അടിച്ച ഗോളുകളുടെ എണ്ണം നാലായി ഉയർന്നു.

ഗ്രൂപ്പ് ഘട്ടത്തിൽ നോർവേക്കെതിരെ നേടിയ ഇരട്ട ഗോളുകളും, ഇറാഖിനെതിരെ 5-0ത്തിന് വിജയിച്ച മത്സരത്തിലെ ഒരു ഗോളും, സിയാറ്റിലിൽ വെച്ച് ബെൽജിയത്തിനെതിരെ നേടിയ അവസാന ഗോളും ചേർത്താണ് സാർ ഈ നേട്ടം സ്വന്തമാക്കിയത്.

1990-ലെ ലോകകപ്പിൽ കാമറൂൺ ഇതിഹാസം റോജർ മില്ല നാല് ഗോളുകൾ നേടിയിരുന്നു. അന്ന് മില്ലയുടെ പ്രകടനം കാമറൂണിനെ ക്വാർട്ടർ ഫൈനൽ വരെ എത്തിക്കുന്നതിൽ നിർണായക പങ്കുവഹിച്ചു. റൊമാനിയക്കെതിരെ രണ്ട് ഗോളുകളും, റൗണ്ട് ഓഫ് 16-ൽ കൊളംബിയക്കെതിരെ രണ്ട് ഗോളുകളും നേടിയാണ് മില്ല ഈ നേട്ടം കൈവരിച്ചത്.

സെനഗൽ ടൂർണമെന്റിൽ മുന്നോട്ട് കുതിക്കുകയാണെങ്കിൽ ഈ റെക്കോർഡ് തിരുത്താൻ സാറിന് അവസരമുണ്ട്. ലോകകപ്പ് ചരിത്രത്തിൽ ഒരു സെനഗൽ താരം പുറത്തെടുക്കുന്ന ഏറ്റവും മികച്ച പ്രകടനമാണിത്.