തനിക്കെതിരായ വ്യാജ വാർത്തകൾ തള്ളി ഫ്രാങ്കി ഡി യോങ്; മാധ്യമപ്രവർത്തകനെതിരെ രൂക്ഷ വിമർശനം
ബാർസിലോണ മിഡ്ഫീൽഡർ ഫ്രാങ്കി ഡി യോങ് തനിക്കെതിരെ ഉയരുന്ന വ്യാജ വാർത്തകൾക്കെതിരെ പരസ്യമായി രംഗത്തെത്തി. തന്റെ ഫിറ്റ്നസ്, ക്ലബ്ബുമായുള്ള ബന്ധം, കഴിഞ്ഞ സീസണിലെ പ്രധാന മത്സരത്തിൽ കളിക്കാൻ വിസമ്മതിച്ചു തുടങ്ങിയ വിഷയങ്ങളിൽ പ്രചരിക്കുന്ന തെറ്റായ വിവരങ്ങൾ അദ്ദേഹം നിഷേധിച്ചു.
വലതു കാൽമുട്ടിലെ ലിഗമെന്റിന് പരിക്കേറ്റതിനെത്തുടർന്ന് വിശ്രമത്തിലാണ് ഈ ഡച്ച് താരം. ഇപ്പോൾ തന്റെ പൂർണ്ണ ശ്രദ്ധ വീണ്ടെടുക്കലിലാണെങ്കിലും, തന്നെക്കുറിച്ച് പ്രചരിക്കുന്ന അസത്യങ്ങൾ വർധിച്ചുവരുന്നതിൽ താരം കടുത്ത അതൃപ്തി രേഖപ്പെടുത്തി.
ബാഴ്സ പ്ലേ (Barça Play) എന്ന മാധ്യമത്തോട് സംസാരിക്കുമ്പോഴാണ് ഡി യോങ് ഇക്കാര്യങ്ങൾ വ്യക്തമാക്കിയത്. തന്റെ പ്രതിച്ഛായയെ ബാധിക്കുന്ന തരത്തിൽ വ്യാജ വാർത്തകൾ പ്രചരിക്കുന്നത് കൊണ്ടാണ് പ്രതികരിക്കാൻ തീരുമാനിച്ചതെന്ന് അദ്ദേഹം പറഞ്ഞു.
“എന്നെ ചുറ്റിപ്പറ്റി ധാരാളം അഭ്യൂഹങ്ങളും വ്യാജ വാർത്തകളും പ്രചരിക്കുന്നുണ്ട്, അത് എന്നെ അസ്വസ്ഥനാക്കുന്നു. കാര്യങ്ങൾ വ്യക്തമാക്കാനാണ് ഞാൻ ഇന്ന് ഇവിടെ എത്തിയിരിക്കുന്നത്,” അദ്ദേഹം പറഞ്ഞു.
താൻ അത്ലറ്റിക്കോ മാഡ്രിഡിനെതിരായ ചാമ്പ്യൻസ് ലീഗ് മത്സരത്തിൽ കളിക്കാൻ വിസമ്മതിച്ചു എന്ന വാർത്ത തീർത്തും അടിസ്ഥാനരഹിതമാണെന്ന് ഡി യോങ് വ്യക്തമാക്കി. ഇക്കാര്യത്തിൽ സ്പാനിഷ് മാധ്യമപ്രവർത്തകനായ ജെറാർഡ് റൊമേറോയ്ക്കെതിരെ അദ്ദേഹം രൂക്ഷ വിമർശനമുന്നയിച്ചു.
“ജെറാർഡ് റൊമേറോയെ ഉദാഹരണമായി എടുക്കാം. കഴിഞ്ഞ സീസണിൽ അത്ലറ്റിക്കോയ്ക്കെതിരായ മത്സരത്തിൽ ഞാൻ കളിക്കാൻ വിസമ്മതിച്ചു എന്ന് ആദ്യം പറഞ്ഞത് അദ്ദേഹമാണ്. അത് സത്യമല്ല. അങ്ങനെയൊന്ന് സംഭവിച്ചിട്ടില്ല,” താരം പറഞ്ഞു.
മാനേജറുമായുള്ള തന്റെ ബന്ധം മോശമാണെന്നും ക്ലബ്ബുമായി പ്രശ്നങ്ങളുണ്ടെന്നും പ്രചരിക്കുന്ന വാർത്തകളും അദ്ദേഹം തള്ളിക്കളഞ്ഞു. വാർത്തകളുടെ സത്യസന്ധത ഉറപ്പുവരുത്തുന്നതിനേക്കാൾ, അത് പ്രസിദ്ധീകരിക്കുന്നതിനാണ് പല മാധ്യമപ്രവർത്തകരും മുൻഗണന നൽകുന്നതെന്ന് ഡി യോങ് വിമർശിച്ചു.
“ഞാൻ അത്ലറ്റിക്കോ മാഡ്രിഡിനെതിരെ കളിക്കാൻ വിസമ്മതിച്ചു എന്നത് സത്യമല്ല. മാനേജറുമായുള്ള ബന്ധം മോശമാണെന്നതും ക്ലബ്ബുമായുള്ള ബന്ധം വഷളായെന്നതും ഞാൻ ശിക്ഷിക്കപ്പെടുന്നു എന്നതും സത്യമല്ല. ജെറാർഡ് റൊമേറോയാണ് ഇതെല്ലാം പറഞ്ഞത്. അദ്ദേഹം മുമ്പും ഇത്തരം നുണകൾ പറഞ്ഞിട്ടുണ്ട്,” അദ്ദേഹം കൂട്ടിച്ചേർത്തു.
ഇനി ഇത്തരം തെറ്റായ പ്രചാരണങ്ങളെ അവഗണിക്കില്ലെന്നും, അസത്യങ്ങൾ പറയുന്നവർക്ക് മറുപടി നൽകാൻ താൻ ഇനിയും മുന്നോട്ട് വരുമെന്നും ഡി യോങ് വ്യക്തമാക്കി.