പത്ത് വർഷം മുൻപ് പ്രീമിയർ ലീഗിൽ പത്താം സ്ഥാനത്തായിരുന്ന ചെൽസി, തൊട്ടടുത്ത സീസണിൽ പുതിയ പരിശീലകൻ അന്റോണിയോ കോണ്ടെയ്ക്ക് കീഴിൽ ഇംഗ്ലീഷ് ചാമ്പ്യൻമാരായ ചരിത്രമുണ്ട്.

കഴിഞ്ഞ സീസണിലും സമാനമായ രീതിയിൽ പത്താം സ്ഥാനത്താണ് ചെൽസി ഫിനിഷ് ചെയ്തത്. യൂറോപ്യൻ ഫുട്ബോളിൽ ഇടമില്ലാത്ത ടീം ഇപ്പോൾ പുതിയ പരിശീലകൻ സാബി അലോൺസോയുടെ കീഴിലാണ് കളിക്കുന്നത്. കോണ്ടെയെപ്പോലെ അലോൺസോയ്ക്കും ആ ചരിത്രം ആവർത്തിക്കാനാകുമോ എന്നാണ് ആരാധകർ ഉറ്റുനോക്കുന്നത്.

പത്ത് വർഷം മുൻപ് ഇടക്കാല പരിശീലകൻ ഗുസ് ഹിഡിങ്കിന് കീഴിൽ ചെൽസി നേടിയ അതേ പ്രകടനമാണ് 2025-26 സീസണിലും ടീം കാഴ്ചവെക്കുന്നത്. അന്ന് നേടിയതിനേക്കാൾ രണ്ട് പോയിന്റുകൾ മാത്രമാണ് ടീം അധികമായി നേടിയിട്ടുള്ളത്. ഗോളുകളുടെ എണ്ണത്തിലും ഗോൾ വ്യത്യാസത്തിലും വലിയ മാറ്റമില്ല.

ലെസ്റ്റർ സിറ്റിക്ക് പിന്നിൽ 31 പോയിന്റ് വ്യത്യാസത്തിൽ ഫിനിഷ് ചെയ്ത ചെൽസി, തൊട്ടടുത്ത സീസണിൽ കിരീടം നേടുമെന്ന് അന്ന് ആരും കരുതിയിരുന്നില്ല. അന്ന് ആഴ്സണലിനെതിരായ 3-0 തോൽവിക്ക് ശേഷം അന്റോണിയോ കോണ്ടെ ടീമിന്റെ ശൈലി മാറ്റി മൂന്ന് പ്രതിരോധ താരങ്ങളെ വെച്ച് കളിക്കാൻ തീരുമാനിച്ചു. ഈ തന്ത്രപരമായ മാറ്റം തുടർച്ചയായ 13 വിജയങ്ങളിലേക്ക് ടീമിനെ നയിച്ചു.

ഇപ്പോൾ സാബി അലോൺസോയുടെ കീഴിലും സമാനമായ മാറ്റങ്ങൾ പ്രതീക്ഷിക്കാം. ബയർ ലെവർകൂസനെ തോൽവികളില്ലാതെ ബുണ്ടസ്‌ലിഗ ചാമ്പ്യൻമാരാക്കിയപ്പോൾ അലോൺസോ പരീക്ഷിച്ചതും ഈ മൂന്ന് പ്രതിരോധ താരങ്ങളുടെ ശൈലിയാണ്.

അലോൺസോയുടെ ചെൽസിക്ക് പോയിന്റ് പട്ടികയിൽ വലിയ മുന്നേറ്റം നടത്തുക എന്നത് തീർത്തും വെല്ലുവിളിയാണ്. പ്രീമിയർ ലീഗ് ചരിത്രത്തിൽ തന്നെ ഏറ്റവും വലിയ പോയിന്റ് വർധനവായിരുന്നു കോണ്ടെയ്ക്ക് കീഴിൽ ടീം നേടിയത്. എന്നാൽ അത്രയും പോയിന്റുകൾ ടീമിന് ആവശ്യമായി വന്നേക്കില്ല.

പെപ് ഗ്വാർഡിയോളയുടെയും ക്ലോപ്പിന്റെയും കാലത്ത് 97 പോയിന്റ് നേടിയിട്ടും കിരീടം ലഭിക്കാത്ത അവസ്ഥയുണ്ടായിരുന്നു. എന്നാൽ കഴിഞ്ഞ കുറച്ചു വർഷങ്ങളായി കിരീടം നേടാനുള്ള പോയിന്റ് നിലയിൽ കുറവു വന്നിട്ടുണ്ട്. അതുകൊണ്ടുതന്നെ കോണ്ടെയുടെ കാലത്ത് നേടിയ 93 പോയിന്റുകൾ ചെൽസിക്ക് ഇക്കുറി അനിവാര്യമല്ല.