പോർച്ചുഗലിൽ ഫുട്ബോൾ മത്സരത്തിനിടെ മുൻ വെസ്റ്റ് ബ്രോം താരം കുവിൻ കാസ്ട്രോ അന്തരിച്ചു
പോർച്ചുഗലിൽ നടന്ന ഫുട്ബോൾ മത്സരത്തിനിടെ കുഴഞ്ഞുവീണ മുൻ വെസ്റ്റ് ബ്രോം മിഡ്‌ഫീൽഡർ കുവിൻ കാസ്ട്രോ (25) അന്തരിച്ചു. ശനിയാഴ്ച ലിസ്ബണിലെ എസ്റ്റാഡിയോ ഡാസ് സെയ്‌ക്സാസിൽ വെച്ച് നടന്ന മത്സരത്തിനിടെയാണ് സംഭവം. റിയൽ സ്പോർട്ട് ക്ലബ്ബും എസ്ട്രെല ഡി അമഡോറയും തമ്മിലുള്ള സൗഹൃദ മത്സരത്തിന്റെ ആദ്യ പകുതിയിലാണ് കാസ്ട്രോ മൈതാനത്ത് കുഴഞ്ഞുവീണത്.
പ്രീ-സീസൺ സൗഹൃദ മത്സരത്തിനിടെയാണ് കാസ്ട്രോ മരണപ്പെട്ടതെന്ന് ലിസ്ബൺ ഫുട്ബോൾ അസോസിയേഷൻ (AFL) സ്ഥിരീകരിച്ചു. കാസ്ട്രോ തങ്ങളുടെ സ്പോർട്ടിംഗ് കുടുംബത്തിലെ പ്രിയപ്പെട്ട അംഗമായിരുന്നുവെന്ന് റിയൽ സ്പോർട്ട് ക്ലബ്ബ് അനുസ്മരിച്ചു. അദ്ദേഹം വെറുമൊരു കളിക്കാരൻ മാത്രമായിരുന്നില്ലെന്നും, തങ്ങളെ അറിയുന്ന എല്ലാവരിലും മായാത്ത മുദ്ര പതിപ്പിച്ച കുടുംബത്തിന്റെ ഭാഗമായിരുന്നുവെന്നും ക്ലബ്ബ് വ്യക്തമാക്കി.
2021-ലാണ് കാസ്ട്രോ വെസ്റ്റ് ബ്രോമിൽ ചേരുന്നത്. കാരബാവോ കപ്പിൽ ആഴ്‌സണലിനെതിരെയായിരുന്നു താരത്തിന്റെ അരങ്ങേറ്റം. ആ സീസണിൽ സ്വാൻസിക്കെതിരെയും അദ്ദേഹം കളത്തിലിറങ്ങി. പിന്നീട് ലോൺ അടിസ്ഥാനത്തിൽ ബർട്ടൺ ആൽബിയനിലും കളിച്ചു.
കാസ്ട്രോയുടെ വിയോഗത്തിൽ വെസ്റ്റ് ബ്രോം അതീവ ദുഃഖം രേഖപ്പെടുത്തി. ഞായറാഴ്ച ബേൺലിക്കെതിരെ നടക്കുന്ന ചാമ്പ്യൻഷിപ്പ് മത്സരത്തിൽ 25-ാം മിനിറ്റിൽ കൈയടിച്ചുകൊണ്ട് താരത്തിന് ആദരാഞ്ജലി അർപ്പിക്കുമെന്നും, കളിക്കാർ കറുത്ത ആംബാൻഡ് ധരിച്ച് കളിക്കുമെന്നും ക്ലബ്ബ് അറിയിച്ചു.
സ്പോർട്ടിംഗ് ക്ലബ് അക്കാദമിയിൽ വളർന്നുവന്ന കാസ്ട്രോ, ഇംഗ്ലണ്ടിലെ കേംബ്രിഡ്ജ് സിറ്റി, യോർക്ക് സിറ്റി, നോട്ട്സ് കൗണ്ടി തുടങ്ങിയ വിവിധ ക്ലബ്ബുകൾക്കായി ബൂട്ടണിഞ്ഞിട്ടുണ്ട്. കഴിഞ്ഞ വേനൽക്കാലത്താണ് അദ്ദേഹം പോർച്ചുഗലിലേക്ക് മടങ്ങിയത്.