അമ്പത് വയസ്സുകാരനായ ഗല്ലാർഡോ തന്റെ പരിശീലക കരിയറിൽ ചുമതലയേൽക്കുന്ന അഞ്ചാമത്തെ ടീമാണ് ഇക്വഡോർ. 2011-2012 സീസണിൽ ഉറുഗ്വേയുടെ നാഷണലിലൂടെയാണ് അദ്ദേഹം പരിശീലകനായി തന്റെ കരിയർ ആരംഭിച്ചത്. 2014 മുതൽ 2022 വരെ റിവർ പ്ലേറ്റിനെ പരിശീലിപ്പിച്ചതാണ് അദ്ദേഹത്തിന്റെ കരിയറിലെ ഏറ്റവും മികച്ച കാലഘട്ടം. തുടർന്ന് 2023-2024 കാലയളവിൽ സൗദി അറേബ്യൻ ക്ലബ്ബായ അൽ-ഇത്തിഹാദിനെ അദ്ദേഹം പരിശീലിപ്പിച്ചു. ശേഷം 2024 മുതൽ 2026 വരെ വീണ്ടും റിവർ പ്ലേറ്റിൽ മടങ്ങിയെത്തുകയായിരുന്നു.

സെപ്റ്റംബർ 24-ന് ദക്ഷിണ കൊറിയക്കെതിരെ നടക്കുന്ന മത്സരത്തോടെ ഗല്ലാർഡോ ഇക്വഡോർ പരിശീലകനായി അരങ്ങേറ്റം കുറിക്കും. ഏഷ്യൻ പര്യടനത്തിന്റെ ഭാഗമായാണ് ഈ മത്സരം നടക്കുന്നത്.

2030 ലോകകപ്പ് യോഗ്യതാ റൗണ്ട് അവസാനിക്കുന്നത് വരെയാണ് ഇക്വഡോർ ഫുട്ബോൾ ഫെഡറേഷനുമായി ഗല്ലാർഡോ ഒപ്പുവെച്ചിരിക്കുന്ന കരാർ. പോർച്ചുഗൽ-സ്പെയിൻ-മൊറോക്കോ സംയുക്തമായി ആതിഥേയത്വം വഹിക്കുന്ന ലോകകപ്പിലേക്ക് ടീം യോഗ്യത നേടുകയാണെങ്കിൽ കരാർ നീട്ടാനും സാധ്യതയുണ്ട്.