റയോ വല്ലെകാനോ സ്റ്റേഡിയം ആക്രമിക്കപ്പെട്ടു; വിഐപി ബോക്സുകളിൽ വ്യാപക നാശനഷ്ടം

സ്പാനിഷ് ഫസ്റ്റ് ഡിവിഷൻ ക്ലബ്ബായ റയോ വല്ലെകാനോയുടെ ഹോം സ്റ്റേഡിയത്തിൽ മത്സരം നടക്കാനിരിക്കെ അതിക്രമം. സ്റ്റേഡിയത്തിന്റെ ഭിത്തികളിൽ ഗ്രഫിറ്റികൾ എഴുതുകയും വസ്തുവകകൾ നശിപ്പിക്കുകയും ചെയ്ത നിലയിലാണ് കണ്ടെത്തിയത്.

ഇന്ന് പുലർച്ചെ ക്ലബ്ബിന്റെ തന്നെ തീവ്രവാദികളായ ആരാധകർ സ്റ്റേഡിയത്തിനകത്ത് അതിക്രമിച്ചു കയറിയതായാണ് സ്പാനിഷ് മാധ്യമങ്ങൾ റിപ്പോർട്ട് ചെയ്യുന്നത്. സ്റ്റേഡിയത്തിലെ സോഷ്യൽ ഏരിയയും വിഐപി ബോക്സുകളുമാണ് ഇവർ പ്രധാനമായും ലക്ഷ്യമിട്ടത്. ക്ലബ്ബിന്റെ ആസ്ഥാനത്ത് മോഷണം നടന്നതായും റയോ വല്ലെകാനോ അധികൃതർ സ്ഥിരീകരിച്ചു. സംഭവത്തിന് പിന്നാലെ സ്റ്റേഡിയത്തിലെ നാശനഷ്ടങ്ങളുടെ ചിത്രങ്ങളും ക്ലബ്ബ് പുറത്തുവിട്ടു.

ലാ ലിഗ 2025/26 സീസണിൽ എട്ടാം സ്ഥാനത്തും നിലവിലെ സീസണിൽ 12-ാം സ്ഥാനത്തുമാണ് റയോ വല്ലെകാനോ. കഴിഞ്ഞ ജൂലൈ മുതൽ ക്ലബ്ബ് കടുത്ത പ്രതിസന്ധിയിലൂടെയാണ് കടന്നുപോകുന്നത്. ക്ലബ്ബ് പ്രസിഡന്റ് റൗൾ മാർട്ടിൻ പ്രസക്കെതിരെയാണ് ആരാധകരുടെ പ്രതിഷേധം കേന്ദ്രീകരിച്ചിരിക്കുന്നത്.

സ്റ്റേഡിയത്തിൽ അക്രമം നടന്ന് മണിക്കൂറുകൾക്ക് ശേഷം ട്രോഫിയോ ഡി വല്ലെകാസ് മത്സരത്തിൽ റയോ വല്ലെകാനോ കഗ്ലിയാരിയെ നേരിട്ടു. മത്സരം അവസാനഘട്ടത്തിൽ എത്തിനിൽക്കെ, പ്രസിഡന്റ് ഇരുന്ന വിഐപി ബോക്സുകൾക്ക് സമീപം ആരാധകർ ബാനറുകളും മുദ്രാവാക്യങ്ങളുമായി പ്രതിഷേധിക്കുകയും ചെയ്തു.