മാഞ്ചസ്റ്റർ സിറ്റി വനിതാ ഫുട്ബോൾ ടീമിലേക്ക് പുതിയ താരമെത്തുന്നു. ക്ലബ്ബ് പുറത്തിറക്കിയ ഔദ്യോഗിക പത്രക്കുറിപ്പിലൂടെയാണ് നിവ് ചാൾസ് മാഞ്ചസ്റ്റർ സിറ്റിയിൽ ചേർന്ന വിവരം അറിയിച്ചത്.

കഴിഞ്ഞ ആറ് വർഷമായി ചെൽസിയിൽ കളിച്ച 27 വയസ്സുള്ള ഡിഫൻഡറാണ് നിവ് ചാൾസ്. ചെൽസിയിൽ ആയിരുന്നപ്പോൾ അഞ്ച് തവണ ബാർക്ലേയ്സ് വിമൻസ് സൂപ്പർ ലീഗ് കിരീടവും, നാല് അഡോബ് വിമൻസ് എഫ്‌എ കപ്പുകളും, മൂന്ന് സബ്‌വേ വിമൻസ് ലീഗ് കപ്പുകളും താരം സ്വന്തമാക്കിയിട്ടുണ്ട്. സൗത്ത് വെസ്റ്റ് ലണ്ടൻ ക്ലബ്ബിനായി വിവിധ ടൂർണമെന്റുകളിലായി 173 മത്സരങ്ങളിൽ താരം കളത്തിലിറങ്ങി.

അന്താരാഷ്ട്ര തലത്തിൽ ഇംഗ്ലീഷ് ടീമിനായി 34 തവണ നിവ് ചാൾസ് ബൂട്ടണിഞ്ഞു. ലയണസസ് ടീമിനൊപ്പം യുവേഫ വിമൻസ് യൂറോ, വിമൻസ് ഫൈനലിസിമ, രണ്ട് അർനോൾഡ് ക്ലാർക്ക് കപ്പുകൾ എന്നിവ താരം നേടിയിട്ടുണ്ട്.

മാഞ്ചസ്റ്റർ സിറ്റിയിൽ ചേർന്നതിന് പിന്നാലെ താരം തന്റെ സന്തോഷം പങ്കുവെച്ചു. “ഇവിടെ എത്തിയതിൽ എനിക്ക് വലിയ സന്തോഷമുണ്ട്, പരിശീലനം ആരംഭിക്കാൻ ഞാൻ ആകാംക്ഷയോടെ കാത്തിരിക്കുകയാണ്.”

“പുറത്തുനിന്ന് സിറ്റിയുടെ കളികൾ ശ്രദ്ധിച്ചും, കഴിഞ്ഞ കുറച്ചു വർഷങ്ങളായി അവർക്കെതിരെ കളിച്ചും ഞാൻ അവരുടെ വളർച്ച കണ്ടിട്ടുണ്ട്. ഈ വർഷം ടീം വലിയ വിജയങ്ങളാണ് നേടിയത്. ടീമിലെ കളിക്കാരും സ്റ്റാഫുകളും ചേർന്ന് കെട്ടിപ്പടുക്കുന്ന ഈ വലിയ സംരംഭത്തിന്റെ ഭാഗമാകാൻ ഞാൻ ആഗ്രഹിക്കുന്നു.”

“ക്ലബ്ബിലെ പുതിയ സംസ്കാരവും കളിരീതിയും എനിക്ക് നന്നായി ചേരുന്നതാണ്. ഇതൊരു മികച്ച തീരുമാനമാണെന്ന് ഞാൻ വിശ്വസിക്കുന്നു. നമുക്ക് ഒന്നിച്ച് മികച്ച നേട്ടങ്ങൾ കൈവരിക്കാൻ കഴിയുമെന്ന് പ്രതീക്ഷിക്കുന്നു,” ചാൾസ് പറഞ്ഞു.

ഈ സമ്മർ ട്രാൻസ്ഫർ വിൻഡോയിൽ മാഞ്ചസ്റ്റർ സിറ്റി ഒപ്പിടുന്ന രണ്ടാമത്തെ താരമാണ് നിവ് ചാൾസ്.