ഐഎസ്എൽ പ്രവർത്തനങ്ങൾ അവസാനിപ്പിക്കാനുള്ള തീരുമാനം പുനഃപരിശോധിക്കാൻ ജംഷഡ്പൂർ എഫ്സിക്ക് സമയം അനുവദിച്ച് എഐഎഫ്എഫ്
ഇന്ത്യൻ സൂപ്പർ ലീഗിലെ (ISL) തങ്ങളുടെ പ്രവർത്തനങ്ങൾ അവസാനിപ്പിക്കാനുള്ള തീരുമാനത്തിൽ പുനഃപരിശോധന നടത്താൻ ജംഷഡ്പൂർ എഫ്സിക്ക് കൂടുതൽ സമയം നൽകാൻ ഓൾ ഇന്ത്യ ഫുട്ബോൾ ഫെഡറേഷൻ (AIFF) തീരുമാനിച്ചു. വ്യാഴാഴ്ച ചേർന്ന എക്സിക്യൂട്ടീവ് കമ്മിറ്റി യോഗത്തിലാണ് ഇത് സംബന്ധിച്ച തീരുമാനമെടുത്തത്.
പുതിയ ക്ലബ് അധിഷ്ഠിത വാണിജ്യ മാതൃക സ്വീകരിച്ചതിന് ശേഷമുള്ള 2026-27 സീസണിലെ ഐഎസ്എൽ ഒരുക്കങ്ങൾ എക്സിക്യൂട്ടീവ് കമ്മിറ്റി അവലോകനം ചെയ്തു. സീസണിലേക്കുള്ള പ്രവർത്തനപരമായ ആസൂത്രണങ്ങളിൽ പങ്കാളികളായ ക്ലബ്ബുകളും ഫെഡറേഷനും കൈവരിച്ച പുരോഗതിയെക്കുറിച്ച് അംഗങ്ങളെ അറിയിച്ചതായി എഐഎഫ്എഫ് വാർത്താക്കുറിപ്പിലൂടെ വ്യക്തമാക്കി.
ജംഷഡ്പൂർ എഫ്സിക്ക് തങ്ങളുടെ തീരുമാനം പുനഃപരിശോധിക്കുന്നതിനായി 2026 ഓഗസ്റ്റ് 12 വരെ അധിക സമയം അനുവദിക്കുമെന്ന് എഐഎഫ്എഫ് അറിയിച്ചു.
ന്യൂഡൽഹിയിലെ ഫുട്ബോൾ ഹൗസിൽ വെച്ചാണ് യോഗം നടന്നത്. എഐഎഫ്എഫ് പ്രസിഡന്റ് കല്യാൺ ചൗബേ യോഗത്തിൽ അധ്യക്ഷത വഹിച്ചു.
ട്രഷറർ കിപ അജയ്, ഡെപ്യൂട്ടി സെക്രട്ടറി ജനറൽ എം. സത്യനാരായണൻ, എന്നിവർക്കൊപ്പം ലാൽനിങ്ലോവ ഹ്മാർ, മെൻല എഥൻപ, മോഹൻ ലാൽ, നെയിബൗ സെഖോസ്, സയ്യിദ് ഹസ്നൈൻ നഖ്വി, സയ്യിദ് ഇംതിയാസ് ഹുസൈൻ, ദീപക് ശർമ്മ, വലാങ്ക അലെമാവോ, വിജയ് ബാലി, തോംഗം തബാബി ദേവി, ഷബീർ അലി, ബൈച്ചുങ് ഭൂട്ടിയ, ക്ലൈമാക്സ് ലോറൻസ് തുടങ്ങിയ അംഗങ്ങൾ യോഗത്തിൽ പങ്കെടുത്തു.
ഇതോടൊപ്പം, ഒക്ടോബറിൽ അസർബൈജാനിൽ നടക്കുന്ന പ്രഥമ ഫിഫ അണ്ടർ-15 ലോകകപ്പിനും ഫെസ്റ്റിവലിനുമുള്ള ഇന്ത്യൻ പുരുഷ ടീമിന്റെ പരിശീലകനായി അണ്ടർ-17 കോച്ച് ബിബിയാനോ ഫെർണാണ്ടസിനെ ഫെഡറേഷൻ നിയമിച്ചു.
രഞ്ജിത് ബജാജിനെ ടീം മാനേജറായി അംഗീകരിച്ചു. ടൂർണമെന്റിന്റെ ചട്ടങ്ങൾ പ്രകാരം, 14 കളിക്കാരും ആറ് സ്റ്റാഫ് അംഗങ്ങളും ഉൾപ്പെടെ 20 പേർക്ക് ടീമിൽ ഉൾപ്പെടാം.
Published on Aug 06, 2026