# ഒക്ടോബറിൽ ഇന്ത്യ-ബ്രസീൽ സൗഹൃദ മത്സരം: കൊൽക്കത്തയിലെ സ്റ്റേഡിയം പരിശോധിച്ച് ബ്രസീലിയൻ സംഘം
ഒക്ടോബർ മൂന്നിന് നടക്കാനിരിക്കുന്ന ഇന്ത്യ-ബ്രസീൽ സൗഹൃദ മത്സരത്തിന് മുന്നോടിയായി, കൊൽക്കത്തയിലെ വിവേകാനന്ദ യുവഭാരതി ക്രീഡാംഗൻ ബ്രസീലിയൻ ഫുട്ബോൾ കോൺഫെഡറേഷൻ (CBF) പ്രതിനിധി സംഘം വ്യാഴാഴ്ച പരിശോധിച്ചു.
സ്റ്റേഡിയത്തിലെ കളിക്കളം, പരിശീലന സൗകര്യങ്ങൾ എന്നിവയെക്കുറിച്ച് ഏഴംഗ സംഘം അതീവ ആശങ്ക പ്രകടിപ്പിച്ചതായാണ് റിപ്പോർട്ടുകൾ സൂചിപ്പിക്കുന്നത്. ഗ്രൗണ്ടിലെ പുല്ലിന്റെ സാന്ദ്രത വർദ്ധിപ്പിക്കണമെന്ന് സംഘം ഗ്രൗണ്ട് സ്റ്റാഫിനോട് ആവശ്യപ്പെട്ടു. അല്ലാത്തപക്ഷം വിനീഷ്യസ് ജൂനിയറും സഹതാരങ്ങളും പരിക്കേൽക്കാൻ സാധ്യതയുണ്ടെന്ന് സംഘം മുന്നറിയിപ്പ് നൽകി. ദുരണ്ട് കപ്പിന്റെ ഭാഗമായി നടന്ന ഏതാനും മത്സരങ്ങൾക്ക് ശേഷം ഗ്രൗണ്ടിന്റെ അവസ്ഥ മോശമായതായി റിപ്പോർട്ടുകളിൽ പറയുന്നു.
സ്റ്റേഡിയത്തിലെ ഡ്രസ്സിംഗ് റൂമുകളും ശുചിത്വ സൗകര്യങ്ങളും സിബിഎഫ് പ്രതിനിധികൾ പരിശോധിച്ചു. മത്സരത്തിന് ശേഷം താരങ്ങൾ താമസിക്കാൻ ഉദ്ദേശിക്കുന്ന ഹോട്ടൽ സൗകര്യങ്ങളിൽ സംഘം തൃപ്തി രേഖപ്പെടുത്തി.
അതേസമയം, നിശ്ചയിച്ചിരുന്ന ആസിയാൻ ടൂർണമെന്റിന് പകരം ബ്രസീലിനെതിരായ സൗഹൃദ മത്സരത്തിന് മുൻഗണന നൽകാനുള്ള ഇന്ത്യയുടെ തീരുമാനത്തിനെതിരെ വിമർശനങ്ങൾ ഉയരുന്നുണ്ട്. ഫിഫയുടെ ക്ഷണം സ്വീകരിച്ച് ഇന്ത്യ നേരത്തെ ടൂർണമെന്റിൽ പങ്കെടുക്കാൻ തീരുമാനിച്ചിരുന്നു. ഇന്തോനേഷ്യ, മലേഷ്യ, സിംഗപ്പൂർ എന്നിവർക്കൊപ്പം ഡിവിഷൻ വൺ ഗ്രൂപ്പ് എയിലാണ് ഇന്ത്യയെ ഉൾപ്പെടുത്തിയിരുന്നത്.