ചാപേക്കോൻസെ വിമാനാപകടത്തിൽ രക്ഷപെട്ട താരം കരിയറിലെ അവസാന മത്സരത്തിൽ ടീമിന് പ്രൊമോഷൻ നേടിപ്പൊടുത്തു

2016-ലെ ചാപെകോൻസെ ഫുട്ബോൾ ടീം സഞ്ചരിച്ച വിമാനപകടത്തിൽ നിന്ന് അത്ഭുതകരമായി രക്ഷപ്പെട്ട അലൻ റുഷെൽ, തൻ്റെ വിരമിക്കലിന് മുമ്പുള്ള അവസാന മത്സരത്തിൽ ബ്രസീൽ സെരി എ-യിലേക്ക് പ്രൊമോഷൻ സ്വന്തമാക്കി.

കൊളംബിയയിൽ വെച്ചുണ്ടായ ആ വിമാനദുരന്തത്തിൽ ക്ലബ്ബിന്റെ 19 കളിക്കാരും കോച്ചിംഗ് സ്റ്റാഫും ഉൾപ്പെടെ 71 പേർ കൊല്ലപ്പെട്ടിരുന്നു. ഈ അപകടത്തിൽ ജീവനോടെ രക്ഷപ്പെട്ട വെറും ആറുപേരിൽ ഒരാളായിരുന്നു 37-കാരനായ റുഷെൽ.

ഗുരുതരമായ പരിക്കുകളും നട്ടെല്ലിന് ശസ്ത്രക്രിയയും നേരിടേണ്ടി വന്നിട്ടും, ഒരു വർഷത്തിന് ശേഷം റുഷെൽ ഫുട്ബോളിലേക്ക് തിരിച്ചെത്തി. 2023-ൽ താൻ വീണ്ടും ചേർന്ന തന്റെ ബാല്യകാല ക്ലബ്ബായ യുവെന്റുമൊത്ത് ബ്രസീലിയൻ ടോപ് ഫ്ലൈറ്റിലേക്ക് പ്രൊമോഷൻ നേടിയ ശേഷമാണ് അദ്ദേഹം ഇപ്പോൾ വിരമിക്കുന്നത്.

ബൊട്ടാഫോഗോയ്‌ക്കെതിരായ മത്സരത്തിൽ 2-0ന്റെ ജയം ഉറപ്പാക്കാൻ 74-ാം മിനിറ്റിൽ പകരക്കാരനായി റുഷെൽ കളത്തിലിറങ്ങി. തുടർന്ന് ക്ലബ്ബിന്റെ ആൽഫ്രഡോ ജാകോണി സ്റ്റേഡിയത്തിൽ ആരാധകരുടെ അകമ്പടിയോടെ അദ്ദേഹം വികാരനിർഭരമായ യാത്രയപ്പ് ഏറ്റുവാങ്ങി.

മത്സരത്തിന് മുമ്പ് ആരാധകർ അദ്ദേഹത്തെ തോളിലേറ്റി സ്റ്റേഡിയത്തിലേക്ക് ആനയിക്കുകയും ചെയ്തു.

“ക്ലബ്ബ് സെരി എ-യിൽ ആയിരുന്നപ്പോഴാണ് ഞാൻ 2007-ൽ ഇവിടെ എത്തിയത്, ഇപ്പോൾ ക്ലബ്ബിനെ അവിടെ എത്തിച്ചുകൊണ്ടാണ് ഞാൻ പടിയിറങ്ങുന്നത്,” മത്സരത്തിന് ശേഷം ഒരു ബ്രസീലിയൻ ടെലിവിഷൻ ചാനലിനോട് റുഷെൽ പറഞ്ഞു.

“എന്റെ ശരീരം ഇനി ഒപ്പഴയ്ക്കുന്നില്ല. തുടർച്ചയായി രണ്ട് കാൽമുട്ട് ശസ്ത്രക്രിയകൾക്ക് വിധേയനായതിനാൽ ഞാൻ എന്റെ സ്വന്തം ശരീരത്തോടുള്ള പോരാട്ടത്തിലായിരുന്നു.”

“കളിക്കളത്തിൽ തുടരുന്നത് എപ്പോഴും സന്തോഷമുള്ള കാര്യമായിരുന്നെങ്കിലും, ഇനി അതൊരു വിധേനയും സാധ്യമാകുമായിരുന്നില്ല.”

വിരമിക്കൽ സ്ഥിരീകരിച്ചുകൊണ്ട് മത്സരത്തിന് തലേദിവസം സമൂഹമാധ്യമങ്ങളിൽ പങ്കുവെച്ച വീഡിയോയിൽ റുഷെൽ വിമാനപകടത്തെക്കുറിച്ച് ഓർമിച്ചു.

“ഫുട്ബോൾ എനിക്ക് അത്ഭുതകരമായ നിമിഷങ്ങൾ സമ്മാനിച്ചിട്ടുണ്ട്, എന്നാൽ ഒരിക്കലും ഞാൻ ഊഹിക്കാത്ത വെല്ലുവിളികളാണ് ജീവിതം എനിക്ക് മുന്നിൽ വെച്ചത്. 2016 നവംബർ 29, എന്റെ ജീവിതത്തെ എന്നെന്നേക്കുമായി മാറ്റിമറിച്ച ഒരു ദിവസം.”

“എന്റെ സുഹൃത്തുക്കളെയും സഹപ്രവർത്തകരെയും സ്വപ്നങ്ങളും പദ്ധതികളും പങ്കിട്ട ആളുകളെയും എനിക്ക് നഷ്ടപ്പെട്ടു.”

“ദൈവം എനിക്ക് ഒരു രണ്ടാം അവസരം നൽകി. എനിക്ക് വീണ്ടും ഫുട്ബോൾ കളിക്കാൻ കഴിയുമോ എന്ന് എനിക്കറിയില്ലായിരുന്നു, എങ്കിലും ഞാൻ ഇവിടെയുണ്ടെങ്കിൽ എന്റെ ജീവിതത്തിന് ഇനിയും ഒരു ലക്ഷ്യമുണ്ടെന്ന് ഞാൻ വിശ്വസിച്ചു.”

“ഇന്ന്, വിടപറയാനുള്ള നിമിഷം സ്വയം തിരഞ്ഞെടുക്കാനുള്ള പദവി എനിക്കുണ്ട്.”

എങ്കിലും, റുഷെലിന്റെ മുൻ ക്ലബ്ബായ ചാപെകോൻസെയുടെ കാര്യത്തിൽ മറിച്ചുള്ള അനുഭവങ്ങളാണ് ഉണ്ടായത്. ടോപ് ഫ്ലൈറ്റിലെ ഒരു സീസണിന് ശേഷം തരംതാഴ്ത്തപ്പെട്ട അവർക്ക് പകരക്കാരായി യുവെന്റൂസ് സെരി എ-യിൽ എത്തി.

ഈ സീസണിൽ 34 മത്സരങ്ങളിൽ നിന്ന് വെറും നാല് കളികളിൽ മാത്രം വിജയം കണ്ട ക്ലബ്ബ് വീണ്ടും സെരി ബി-യിലേക്ക് മടങ്ങും.