ജോവോ പെഡ്രോയ്ക്ക് പുതിയ കരാർ നൽകാൻ ചെൽസി; ബാഴ്സലോണയുടെ നീക്കങ്ങളെ തടയാൻ തീരുമാനം
ജോവോ പെഡ്രോയ്ക്ക് പുതിയ കരാർ നൽകാൻ ഒരുങ്ങി ചെൽസി. ബാഴ്സലോണ ഉൾപ്പെടെയുള്ള ക്ലബ്ബുകൾ താരത്തിൽ താല്പര്യം പ്രകടിപ്പിച്ചതോടെയാണ് പെഡ്രോയെ ക്ലബ്ബിൽ തന്നെ നിലനിർത്താനുള്ള നടപടികളുമായി ചെൽസി മുന്നോട്ട് പോകുന്നത്. ‘ദി അത്ലറ്റിക്’ ആണ് ഇതുസംബന്ധിച്ച വാർത്ത റിപ്പോർട്ട് ചെയ്തത്.
കഴിഞ്ഞ സമ്മറിലാണ് 50 മില്യൺ പൗണ്ടിലധികം മുടക്കി ബ്രൈറ്റൺ ആൻഡ് ഹോവ് അൽബിയോണിൽ നിന്ന് പെഡ്രോ സ്റ്റാംഫോർഡ് ബ്രിഡ്ജിലെത്തിയത്. ചെൽസിക്കായി മികച്ച പ്രകടനമാണ് താരം കാഴ്ചവെച്ചത്. 50 മത്സരങ്ങളിൽ നിന്ന് 20 ഗോളുകളും ഒമ്പത് അസിസ്റ്റുകളും താരം സ്വന്തമാക്കി. നിലവിൽ 2032 വരെ കരാറുള്ള പെഡ്രോയ്ക്ക് പുതിയ കരാർ നൽകി ആദരിക്കാനാണ് ചെൽസി മാനേജ്മെന്റിന്റെ തീരുമാനം. 24 വയസ്സുകാരനായ പെഡ്രോയുടെ തകർപ്പൻ പ്രകടനം ബാഴ്സലോണയുടെ ശ്രദ്ധയിൽപ്പെട്ടതോടെയാണ് വെസ്റ്റ് ലണ്ടൻ ക്ലബ്ബ് അദ്ദേഹത്തിന്റെ ഭാവി സുരക്ഷിതമാക്കാൻ തീരുമാനിച്ചത്.
ബ്രസീലിയൻ ക്ലബ്ബായ ഫ്ലുമിനെൻസിലൂടെയാണ് പെഡ്രോ തന്റെ കരിയർ ആരംഭിച്ചത്. പിന്നീട് 2020-ൽ വാറ്റ്ഫോർഡിൽ ചേർന്നു. 2023-ൽ 30 മില്യൺ പൗണ്ടിന് ബ്രൈറ്റണിലേക്ക് മാറിയതോടെയാണ് താരം മികച്ച ഫോർവേഡ് എന്ന നിലയിൽ ശ്രദ്ധേയനായത്. ബ്രൈറ്റണിനായി കളിച്ച രണ്ട് വർഷത്തിനിടെ 70 മത്സരങ്ങളിൽ നിന്ന് 30 ഗോളുകൾ അദ്ദേഹം നേടിയിട്ടുണ്ട്. ചെൽസിയിലെ മികച്ച പ്രകടനത്തിന് ശേഷവും കാർലോ ആൻസലോട്ടി പ്രഖ്യാപിച്ച ലോകകപ്പ് ടീമിൽ ഇടം ലഭിക്കാതിരുന്നത് പലരെയും അത്ഭുതപ്പെടുത്തിയിരുന്നു.
അതേസമയം, ട്രാൻസ്ഫർ വിപണിയിൽ ചെൽസി സജീവമാണ്. ആസ്റ്റൺ വില്ലയിൽ നിന്ന് മോർഗൻ റോജേഴ്സിനെ ബ്രിട്ടീഷ് റെക്കോർഡ് തുകയായ 117 മില്യൺ പൗണ്ട് നൽകി ക്ലബ്ബ് സ്വന്തമാക്കി. ക്രിസ്റ്റൽ പാലസിൽ നിന്ന് 52 മില്യൺ പൗണ്ട് മുടക്കി മാക്സെൻസ് ലാക്രോയിസിനെയും ചെൽസി ടീമിലെത്തിച്ചു. പുതിയ പരിശീലകൻ സാബി അലോൺസോയുടെ നിർദ്ദേശപ്രകാരം പരിചയസമ്പന്നരായ ഡാനി വെൽബെക്കിനെയും ജോർദാൻ ഹെൻഡേഴ്സനെയും ടീമിലെത്തിക്കാനുള്ള നീക്കങ്ങളും അന്തിമഘട്ടത്തിലാണ്.