വിവേചനപരമായ മുദ്രാവാക്യം വിളിച്ചതിന് ഹൾ സിറ്റിക്ക് പിഴ; നടപടിയുമായി എഫ്.എ
ഫെബ്രുവരിയിൽ ചെൽസിക്കെതിരായ എഫ്.എ കപ്പ് മത്സരത്തിനിടെ വിവേചനപരമായ മുദ്രാവാക്യങ്ങൾ മുഴക്കിയതിന് ഹൾ സിറ്റി ഫുട്ബോൾ ക്ലബിന് 30,000 പൗണ്ട് പിഴ ചുമത്തി. 4-0 എന്ന സ്കോറിന് ഹൾ സിറ്റി പരാജയപ്പെട്ട മത്സരത്തിനിടെയാണ് സംഭവം നടന്നത്.
ശനിയാഴ്ച പ്രീമിയർ ലീഗിൽ ചെൽസിക്കെതിരെ വീണ്ടും മത്സരിക്കാനിരിക്കെ, ഇത്തരം പ്രവൃത്തികൾ ആവർത്തിക്കരുതെന്ന് ക്ലബ് ആരാധകരോട് അഭ്യർത്ഥിച്ചു. ഫെബ്രുവരിയിൽ എം.കെ.എം സ്റ്റേഡിയത്തിൽ നടന്ന മത്സരത്തിന് പിന്നാലെ, ആരോപണവിധേയരായ മൂന്ന് ആരാധകർക്ക് ക്ലബ് മൂന്ന് വർഷത്തെ വിലക്ക് ഏർപ്പെടുത്തി.
മത്സരത്തിനിടെ ഹോമോഫോബിക് (ലൈംഗിക ന്യൂനപക്ഷങ്ങൾക്കെതിരായ) മുദ്രാവാക്യങ്ങൾ വിളിച്ചതിന് മൂന്ന് പേരെ അറസ്റ്റ് ചെയ്തിരുന്നു. ആ സമയത്ത് ഇത്തരം മുദ്രാവാക്യങ്ങൾ നിർത്താൻ പി.എ സിസ്റ്റത്തിലൂടെയും സ്ക്രീനുകളിലൂടെയും കാണികൾക്ക് തുടർച്ചയായി മുന്നറിയിപ്പ് നൽകിയിരുന്നു. സംഭവത്തെ “കളിയിലെ കറ” എന്നാണ് ഒരു ആരാധക കൂട്ടായ്മ വിശേഷിപ്പിച്ചത്.
ആരാധകരുടെ ഭാഗത്തുനിന്നുണ്ടായ ഇത്തരം മോശം പെരുമാറ്റം തടയാൻ ക്ലബിന് കഴിഞ്ഞില്ലെന്ന് ചൂണ്ടിക്കാട്ടി ഫുട്ബോൾ അസോസിയേഷൻ (എഫ്.എ) നേരത്തെ കുറ്റം ചുമത്തിയിരുന്നു. ലൈംഗിക ആഭിമുഖ്യത്തെ പരിഹസിക്കുന്ന രീതിയിലുള്ള വാക്കുകളോ പെരുമാറ്റമോ ഉണ്ടാകാൻ പാടില്ലെന്ന നിയമം ലംഘിച്ചതിനാണ് നടപടി. ക്ലബ് ഈ കുറ്റം സമ്മതിച്ചതിനെ തുടർന്നാണ് 30,000 പൗണ്ട് പിഴ ഈടാക്കിയത്.
“ഉത്തരവാദികളായ ആരാധകർ ഉപയോഗിച്ച അധിക്ഷേപകരമായ ഭാഷയെ ഹൾ സിറ്റി ശക്തമായി അപലപിക്കുന്നു. ഈ മുദ്രാവാക്യം ഒരു ഹോമോഫോബിക് അധിക്ഷേപമായി കണക്കാക്കപ്പെടുന്നതും, അത് വിദ്വേഷ കുറ്റകൃത്യമായി മാറാൻ സാധ്യതയുള്ളതുമാണ്,” ക്ലബ് വ്യക്തമാക്കി.
ഇത്തരം മുദ്രാവാക്യങ്ങൾ വിളിക്കുന്നവർക്കെതിരെ അറസ്റ്റും ക്രിമിനൽ നടപടികളും ഉണ്ടാകുമെന്ന് ക്ലബ് മുന്നറിയിപ്പ് നൽകി. ശനിയാഴ്ച സ്റ്റാംഫോർഡ് ബ്രിഡ്ജിൽ നടക്കുന്ന മത്സരത്തിന് മുന്നോടിയായി, ഏത് തരത്തിലുള്ള വിവേചനങ്ങളും അംഗീകരിക്കാനാവില്ലെന്നും അവ വെച്ചുപൊറുപ്പിക്കില്ലെന്നും ക്ലബ് ആരാധകരെ ഓർമ്മിപ്പിച്ചു.