ബയേൺ മ്യൂണിക് പരിശീലകൻ വിൻസെന്റ് കൊമ്പാനി ആശുപത്രിയിൽ; പരിശീലനത്തിനിടെ കുഴഞ്ഞുവീണു
ബയേൺ മ്യൂണിക് പരിശീലകൻ വിൻസെന്റ് കൊമ്പനിയെ ആശുപത്രിയിൽ പ്രവേശിപ്പിച്ചു. വെള്ളിയാഴ്ച ക്ലബ്ബിന്റെ രണ്ടാം നിര ടീമിന്റെ പരിശീലനം നിരീക്ഷിക്കുന്നതിനിടെ അദ്ദേഹം കുഴഞ്ഞുവീഴുകയായിരുന്നു.
കഴിഞ്ഞ കുറച്ചു ദിവസങ്ങളായി വൈറസ് ബാധയെത്തുടർന്ന് അദ്ദേഹം അസ്വസ്ഥനായിരുന്നു. ഇതിനെത്തുടർന്ന് ആഴ്സണലിനെതിരായ ചാമ്പ്യൻസ് ലീഗ് മത്സരത്തിന് മുന്നോടിയായി ചൊവ്വാഴ്ച നടന്ന വാർത്താസമ്മേളനത്തിലും അദ്ദേഹം പങ്കെടുത്തിരുന്നില്ല. എങ്കിലും, ബുധനാഴ്ച നടന്ന മത്സരത്തിൽ ബയേൺ മ്യൂണിക് പരിശീലകനായി അദ്ദേഹം ഡഗ്-ഔട്ടിലുണ്ടായിരുന്നു.
“എഫ്സി ബയേണിന്റെ അമെച്വർ ടീമിന്റെ പരിശീലനത്തിനിടെ കുഴഞ്ഞുവീണ വിൻസെന്റ് കൊമ്പാനിക്ക് അടിയന്തര വൈദ്യസഹായം തേടേണ്ടി വന്നു,” എന്ന് ബുണ്ടസ് ലീഗ ക്ലബ്ബ് ഔദ്യോഗിക പ്രസ്താവനയിൽ വ്യക്തമാക്കി.
ക്ലബ്ബിന്റെ രണ്ടാം നിര ടീമിന്റെ പരിശീലനം നിരീക്ഷിക്കുന്നതിനിടയിലാണ് ഈ സംഭവം നടന്നതെന്ന് ക്ലബ്ബ് അറിയിച്ചു. കൊമ്പാനി ഇപ്പോൾ ആശുപത്രിയിൽ വിദഗ്ധ ചികിത്സയ്ക്ക് വിധേയനായി വരികയാണ്. അദ്ദേഹത്തിന്റെ ആരോഗ്യനില കണക്കിലെടുത്ത് നിലവിൽ പരിശീലനവും മത്സരങ്ങളുടെ ചുമതലകളും പരിശീലക സംഘം ഏറ്റെടുക്കും.
ഞായറാഴ്ച ഫ്രീബർഗിനെതിരായ ജർമ്മൻ ലീഗ് മത്സരമാണ് ബയേണിന്റെ അടുത്ത മത്സരം.
“വിൻസെന്റ് കൊമ്പാനിയുടെ ആരോഗ്യമാണ് ഞങ്ങളുടെ മുൻഗണന. അദ്ദേഹം വേഗത്തിൽ സുഖം പ്രാപിക്കാൻ എഫ്സി ബയേൺ സാധ്യമായതെല്ലാം ചെയ്യും,” എന്ന് ബയേൺ സ്പോർട്ടിങ് ഡയറക്ടർ മാക്സ് എബെർൽ പറഞ്ഞു. “വിന്നിക്ക് ആവശ്യമായ എല്ലാ വൈദ്യസഹായവും പിന്തുണയും ഞങ്ങൾ നൽകും. അദ്ദേഹത്തിന് ആവശ്യമായ സമയവും നൽകും. ഞങ്ങൾക്ക് പൂർണ്ണ വിശ്വാസമുള്ള അദ്ദേഹത്തിന്റെ പരിശീലക സംഘം ചുമതലകൾ ഏറ്റെടുക്കും. എല്ലാവരും അദ്ദേഹത്തിന് വേഗത്തിൽ സുഖം പ്രാപിക്കട്ടെ എന്ന് ആശംസിക്കുന്നു,” അദ്ദേഹം കൂട്ടിച്ചേർത്തു.
ആഴ്സണലിനെതിരായ മത്സരത്തിന് മുന്നോടിയായി നടന്ന വാർത്താസമ്മേളനത്തിൽ കൊമ്പാനിയുടെ അസിസ്റ്റന്റുമാരിൽ ഒരാളായ ആരോൺ ഡാങ്ക്സ് ആണ് പങ്കെടുത്തത്.