പ്രീമിയർ ലീഗ് ക്ലബ്ബുകളുടെ ശക്തമായ താല്പര്യം നിലനിൽക്കെ, ലില്ലെ ഒഎസ്‌സി താരം അയ്യൂബ് ബൗഅദ്ദി (18) ഒരു സീസൺ കൂടി തന്റെ ക്ലബ്ബിൽ തന്നെ തുടരണമെന്ന് ലില്ലെ പ്രസിഡന്റ് ഒലിവിയർ ലെറ്റാങ് പറഞ്ഞു.

2026 ഫിഫ ലോകകപ്പിന് മുൻപ് തന്നെ ഫുട്ബോൾ ലോകത്ത് വലിയ ശ്രദ്ധ നേടിയ താരമാണ് ബൗഅദ്ദി. 16-ാം വയസ്സിൽ തന്നെ യുവേഫ ചാമ്പ്യൻസ് ലീഗിൽ കളിച്ചതോടെ യൂറോപ്പിലെ പ്രമുഖ ക്ലബ്ബുകൾ, പ്രത്യേകിച്ച് പ്രീമിയർ ലീഗിലെ ടീമുകൾ താരത്തിനായി രംഗത്തെത്തിയിരുന്നു. വടക്കേ അമേരിക്കയിൽ നടന്ന ലോകകപ്പിൽ ബ്രസീലിനെതിരെ അടക്കം മൊറോക്കോയ്ക്ക് വേണ്ടി താരം പുറത്തെടുത്ത മികച്ച പ്രകടനങ്ങൾ അദ്ദേഹത്തിന്റെ മൂല്യം വൻതോതിൽ ഉയർത്തിയിട്ടുണ്ട്. ദി അത്ലറ്റിക് റിപ്പോർട്ട് പ്രകാരം, നിലവിൽ 100 ദശലക്ഷം യൂറോയാണ് ലില്ലെ ഈ മിഡ്‌ഫീൽഡർക്ക് വിലയിട്ടിരിക്കുന്നത്.

മാഞ്ചസ്റ്റർ സിറ്റി ബൗഅദ്ദിയെ ടീമിലെത്തിക്കാൻ ശക്തമായ ശ്രമങ്ങൾ നടത്തുന്നതായി ഈ ആഴ്ച ആദ്യം റിപ്പോർട്ടുകൾ പുറത്തുവന്നിരുന്നു. ആഴ്സണലും മാഞ്ചസ്റ്റർ യുണൈറ്റഡും താരത്തിനായി രംഗത്തുണ്ട്. എന്നാൽ, ഈ സമ്മറിൽ ഒരു മിഡ്‌ഫീൽഡറെ ടീമിലെടുക്കാൻ പാരിസ് സെയ്ന്റ് ജെർമ്മൻ (പിഎസ്ജി) താല്പര്യപ്പെടുന്നില്ല.

ഒരു കരാറിൽ ഒപ്പുവെക്കുകയാണെങ്കിൽ താരത്തെ ലില്ലെയിലേക്ക് തന്നെ ലോണിൽ അയക്കാൻ മാഞ്ചസ്റ്റർ സിറ്റിക്ക് പദ്ധതിയില്ല. എങ്കിലും, വ്യാഴാഴ്ച നടന്ന പത്രസമ്മേളനത്തിൽ സംസാരിച്ച ലെറ്റാങ്, താരം സ്റ്റേഡ് പിയറി മൗറോയിൽ ഒരു സീസൺ കൂടി തുടരണമെന്ന് അഭിപ്രായപ്പെട്ടു.

“ലോകകപ്പിന് ശേഷം തിരിച്ചെത്തിയതുമുതൽ ഞങ്ങൾ കൂടിക്കാഴ്ച നടത്തിയിട്ടുണ്ട്. ഞങ്ങൾക്ക് തമ്മിൽ എന്താണ് സംസാരിച്ചതെന്ന് വെളിപ്പെടുത്താൻ കഴിയില്ല. എന്തും സംഭവിക്കാം, എങ്കിലും അദ്ദേഹം ഒരു സീസൺ കൂടി നമ്മളോടൊപ്പം തുടരണമെന്നാണ് എന്റെ അഭിപ്രായം. അദ്ദേഹം ഇവിടെ തുടരാൻ സാധ്യത വളരെ കൂടുതലാണ്, അതിൽ അദ്ദേഹത്തിന് വലിയ സന്തോഷവുമുണ്ടാകും,” ലെറ്റാങ് പറഞ്ഞു.