പിഎസ്ജിയും നൈക്കും തമ്മിലുള്ള കായിക വസ്ത്ര കരാർ പുതുക്കാൻ ഒരുങ്ങുന്നതായി ലിക്കിപ്പ് (L’Equipe) റിപ്പോർട്ട് ചെയ്യുന്നു. 1989 മുതൽ പിഎസ്ജിയുടെ കിറ്റ് വിതരണക്കാരാണ് അമേരിക്കൻ ബ്രാൻഡായ നൈക്ക്. ഈ ദീർഘകാല ബന്ധം വരും വർഷങ്ങളിലും തുടരും. 2032 വരെയായിരുന്നു പിഎസ്ജിയും നൈക്കും തമ്മിലുള്ള നിലവിലെ കരാർ കാലാവധി. എന്നാൽ, 2025-ൽ പിഎസ്ജി തങ്ങളുടെ കന്നി ചാമ്പ്യൻസ് ലീഗ് കിരീടം നേടിയതിന് പിന്നാലെ, പുതിയ കരാർ വ്യവസ്ഥകൾക്കായി ക്ലബ് പ്രസിഡന്റ് നാസർ അൽ-ഖെലൈഫി ആവശ്യപ്പെടുകയായിരുന്നു.

ലിക്കിപ്പിന്റെ റിപ്പോർട്ട് പ്രകാരം, അഞ്ച് വർഷത്തെ കരാർ നീട്ടി നൽകാനാണ് ചർച്ചകൾ പുരോഗമിക്കുന്നത്. ഇതോടെ കരാർ കാലാവധി 2037 വരെ നീളും. കരാർ പുതുക്കുന്നതോടെ നൈക്കിൽ നിന്ന് പിഎസ്ജിക്ക് ലഭിക്കുന്ന പ്രതിഫലത്തുകയിൽ വലിയ വർധനവുണ്ടാകും. നിലവിൽ വർഷം 60 ദശലക്ഷം യൂറോയാണ് പിഎസ്ജിക്ക് നൈക്ക് നൽകുന്നത്. ഇത് 100 ദശലക്ഷം യൂറോയായി ഉയരും. ബാഴ്‌സലോണയുടെ നൈക്ക് കരാറിന് സമാനമായ, ലോകത്തിലെ തന്നെ ഏറ്റവും ലാഭകരമായ കിറ്റ് ഡീലുകളിലൊന്നാണ് പിഎസ്ജി ഇപ്പോൾ സ്വന്തമാക്കിയിരിക്കുന്നത്.