തായ്ലൻഡിൽ ഫുട്ബോൾ താരത്തിന് നേരെ പിച്ച് റോളർ പാഞ്ഞുകയറി; ഭയാനകമായ നിമിഷമെന്ന് ആൻഡ്രോസ് ടൗൺസെൻഡ്
തായ്ലൻഡിൽ വച്ച് പിച്ച് റോളറിനടിയിൽപ്പെട്ട സംഭവം ഭയാനകമായിരുന്നുവെന്ന് മുൻ ഇംഗ്ലണ്ട് വിങ്ങർ ആൻഡ്രോസ് ടൗൺസെൻഡ്. നിലവിൽ തായ് ലീഗ് 1 ക്ലബ്ബായ പിടി പ്രചുപ്പിന് വേണ്ടി കളിക്കുന്ന 35-കാരനായ ടൗൺസെൻഡ്, ടോട്ടൻഹാം, ലൂട്ടൺ, ക്രിസ്റ്റൽ പാലസ് എന്നീ ക്ലബ്ബുകൾക്ക് വേണ്ടി മുൻപ് ബൂട്ടണിഞ്ഞിട്ടുണ്ട്. ശനിയാഴ്ച പട്ടാനിയിൽ നടന്ന മത്സരത്തിന് മുന്നോടിയായുള്ള വാർമപ്പിനിടെയാണ് സംഭവം നടന്നത്. മൈതാനത്ത് റോളർ നിയന്ത്രിച്ചിരുന്ന ജീവനക്കാരന് നിയന്ത്രണം നഷ്ടപ്പെട്ടതാണ് അപകടത്തിന് കാരണമായത്.
അപകടത്തിൽ ടൗൺസെൻഡിന്റെ ഇടതുകാൽ റോളറിനടിയിൽ കുടുങ്ങിപ്പോയെങ്കിലും അത്ഭുതകരമായി അദ്ദേഹം പരിക്കുകളില്ലാതെ രക്ഷപ്പെട്ടു. പിന്നീട് നടന്ന മത്സരത്തിൽ പകരക്കാരനായി ഇറങ്ങിയ അദ്ദേഹം ടീമിന്റെ 3-0 വിജയത്തിലും പങ്കാളിയായി. പിയേഴ്സ് മോർഗന്റെ ‘ഫുട്ബോൾ അൺസെൻസേർഡ്’ എന്ന പരിപാടിയിലാണ് താരം ഈ സംഭവത്തെക്കുറിച്ച് ആദ്യമായി പ്രതികരിച്ചത്. ചെറിയ ചതവുകളും പാടുകളും അല്ലാതെ കാര്യമായ പരിക്കുകളില്ലാതെ രക്ഷപ്പെടാനായത് ഭാഗ്യം കൊണ്ടാണ് എന്ന് ടൗൺസെൻഡ് പറഞ്ഞു.
“ഇത് കാണുമ്പോൾ എനിക്ക് അവിശ്വസനീയമായി തോന്നുന്നു. ശരിയായ സമയത്ത് നിലത്ത് വീഴാൻ സാധിച്ചതുകൊണ്ടാണ് കാലൊടിയാതെ രക്ഷപ്പെട്ടത്,” ടൗൺസെൻഡ് പറഞ്ഞു. 13 തവണ ഇംഗ്ലണ്ട് ജേഴ്സി അണിഞ്ഞിട്ടുള്ള ടൗൺസെൻഡ്, വാർമപ്പിനിടെ മൈതാനത്തിന്റെ ഇരുവശത്തും റോളറുകൾ കണ്ടപ്പോൾ തന്നെ സംശയം തോന്നിയിരുന്നുവെന്ന് വെളിപ്പെടുത്തി. “എന്റെ കരിയറിൽ ഇങ്ങനെയൊന്ന് ഞാൻ കണ്ടിട്ടില്ല. എങ്കിലും ഞങ്ങൾ വാർമപ്പ് തുടർന്നു. പെട്ടെന്നാണ് റോളർ എന്റെ മേലേക്ക് വന്നത്,” അദ്ദേഹം കൂട്ടിച്ചേർത്തു.
ഇതിനകം പലതവണ പരിക്കുകളെ അതിജീവിച്ചിട്ടുള്ള താൻ, ഈ സംഭവത്തോടെ ഫുട്ബോൾ കരിയർ അവസാനിപ്പിക്കാൻ ഉദ്ദേശിക്കുന്നില്ലെന്ന് അദ്ദേഹം വ്യക്തമാക്കി. സഹതാരങ്ങൾ ഉടൻ ഡോക്ടറെ കാണാൻ നിർദ്ദേശിച്ചെങ്കിലും വാർമപ്പ് തുടരാനാണ് താൻ തീരുമാനിച്ചത്. “റോളർ എന്റെ കാലിൽ അമർന്നപ്പോൾ ശരിക്കും പേടിച്ചുപോയി. ഇടതുകാൽ ഒടിഞ്ഞുപോകുമെന്ന് ഞാൻ ഭയന്നു. എന്നാൽ കൈകൾ കൊണ്ട് റോളർ ഉയർത്തി സഹതാരങ്ങളുടെ സഹായത്തോടെ പെട്ടെന്ന് തന്നെ പുറത്തുകടക്കാൻ എനിക്ക് സാധിച്ചു,” ടൗൺസെൻഡ് വിവരിച്ചു.
ഇതിനകം പലതവണ ശസ്ത്രക്രിയയ്ക്ക് വിധേയനായ തന്റെ ഇടതുകാലിലെ കണങ്കാലിനും മുട്ടിനും പരിക്കേൽക്കുമോ എന്ന് താൻ ഭയപ്പെട്ടിരുന്നുവെന്നും താരം പറഞ്ഞു. അതേസമയം, ഇൻസ്റ്റാഗ്രാമിലൂടെ തമാശരൂപേണയാണ് താരം സംഭവത്തോട് പ്രതികരിച്ചത്. മുമ്പ് സ്റ്റോക്ക് സിറ്റിയുടെ ബെറ്റ്365 സ്റ്റേഡിയത്തിൽ കളിച്ചതിനെക്കുറിച്ച് മുൻപ് പങ്കുവെച്ച പോസ്റ്റ് ഓർമ്മിപ്പിച്ചുകൊണ്ട്, “സ്റ്റോക്കിലെ എവേ മത്സരം അത്ര മോശമായിരുന്നില്ലെന്ന് ഇപ്പോൾ തോന്നുന്നു” എന്ന് അദ്ദേഹം കുറിച്ചു.