പ്രീമിയർ ലീഗ് മത്സരങ്ങൾ നിയന്ത്രിക്കുമ്പോൾ താൻ രഹസ്യമായി ചെറിയ കളികൾ (mini-games) കളിക്കാറുണ്ടായിരുന്നെന്ന് വെളിപ്പെടുത്തി മുൻ റഫറി മൈക്ക് ഡീൻ. ഈ വെളിപ്പെടുത്തൽ ഫുട്ബോൾ ആരാധകർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. പ്രീമിയർ ലീഗ് മത്സരങ്ങളുടെ ചരിത്രത്തിൽ 22 വർഷം റഫറിയായി സേവനമനുഷ്ഠിച്ച ഡീൻ, 553 മത്സരങ്ങൾ നിയന്ത്രിച്ച ശേഷം 2022-ൽ വിരമിച്ചു.

തന്റെ കരിയറിൽ ഏറെ ശ്രദ്ധിക്കപ്പെട്ട റഫറിമാരിൽ ഒരാളായിരുന്നെങ്കിലും, കളിക്കളത്തിലെ പെരുമാറ്റരീതികളുടെയും സ്വന്തം ‘അഹങ്കാരത്തെക്കുറിച്ചുള്ള’ പരാമർശങ്ങളുടെയും പേരിൽ ഡീൻ പലപ്പോഴും വിവാദങ്ങളിൽ നിറഞ്ഞുനിന്നിട്ടുണ്ട്.

2015-ൽ ബിബിസിയുടെ ‘ഫൈനൽ സ്കോർ’ പരിപാടിയിൽ പണ്ഡിറ്റ് ഗാർത്ത് ക്രൂക്സ് ഡീനിനെതിരെ രൂക്ഷമായ വിമർശനം ഉന്നയിച്ചിരുന്നു. “അദ്ദേഹം പലപ്പോഴും മത്സരത്തിലെ താരമാകാൻ ആഗ്രഹിക്കുന്നു. അത് എന്നെ വല്ലാതെ അലോസരപ്പെടുത്തുന്നുണ്ട്. അദ്ദേഹം മികച്ച മത്സരങ്ങളെ നശിപ്പിക്കുകയാണ്. ഇത് നിങ്ങളെക്കുറിച്ചല്ല മൈക്ക്, മത്സരങ്ങളെക്കുറിച്ചാണ്,” എന്നായിരുന്നു ക്രൂക്സിന്റെ വിമർശനം.

ഇപ്പോൾ, മത്സരങ്ങൾക്കിടെ വിസിൽ മുഴക്കാതെ പരമാവധി സമയം കളയാൻ ശ്രമിക്കാറുണ്ടായിരുന്നു എന്ന ഡീനിന്റെ വെളിപ്പെടുത്തൽ വലിയ വിമർശനങ്ങൾക്ക് വഴിവെച്ചിരിക്കുകയാണ്.

‘ജെയിമി വാർഡിസ് ഹാവിംഗ് എ പാർട്ടി’ പോഡ്‌കാസ്റ്റിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. “ഞങ്ങൾ തമാശയ്ക്കായി ചില കളികൾ ചെയ്യാറുണ്ടായിരുന്നു. വിസിൽ മുഴക്കാതെ എത്ര സമയം കളിക്കാൻ കഴിയുമെന്ന് ഞങ്ങൾ നോക്കും. വി.എ.ആർ (VAR) വരുന്നതിന് മുൻപ് പ്രീമിയർ ലീഗിൽ പലതവണ ഇത് ചെയ്തിട്ടുണ്ട്. 20-25 മിനിറ്റുകൾ വരെ വിസിൽ മുഴക്കാതെ മത്സരം മുന്നോട്ട് കൊണ്ടുപോയിട്ടുണ്ട്,” എന്ന് ഡീൻ പറഞ്ഞു.